शिक्षक पात्रता परीक्षा (टीईटी)

प्राथमिक शिक्षक होण्यासाठी आता केवळ शिक्षण पदविका अभ्यासक्रम उत्तीर्ण असणे आवश्यक नसून त्यासाठी उमेदवाराला शिक्षक पात्रता परीक्षा (टीईटी) उत्तीर्ण करणे आवश्यक होणार आहे. केंद्र शासनाने बालकांचा मोफत व सक्तीच्या शिक्षणाचा अधिकार अधिनियम, 2009 अंतर्गत इयत्ता 1 ली ते 8 वी वर्गासाठी शिक्षक पदावर नियुक्त होणाऱ्या उमेदवारांसाठी ही परीक्षा सक्तीची केली आहे. कायद्यानुसार ही शिक्षक पात्रता परीक्षा अनिवार्य असणे गरजेचे आहे. सदर परीक्षा नोव्हेंबर 2013 मध्ये घेण्याचे महाराष्ट्र राज्य परीक्षा परिषदेने प्रस्तावित केले आहे. संबंधित शासन निर्णय व परीक्षेची माहिती www.mscepune.in या संकेतस्थळावर उपलब्ध आहे. 

ही परीक्षा सर्व शाळा, खाजगी अनुदानित-विना अनुदानित, स्वयंअर्थसहाय्यीत शाळा यामध्ये शिक्षक म्हणून काम करण्यास इच्छुक असणाऱ्या शिक्षकांसाठी लागू राहणार आहे. परीक्षेसाठी इयत्ता 1 ली ते 5 वी साठी कनिष्ठ प्राथमिक व इयत्ता 6 वी ते 8 वी साठी उच्च प्राथमिक असे दोन गट करण्यात आले आहेत. 

या दोन गटातील शिक्षक पदासाठी प्रत्येकी एक प्रश्न पत्रिका राहणार असून त्याचे स्वरुप व काठीण्यपातळी अनुक्रमे ते 5 वी माध्यमिकसाठी व इयत्ता 6 वी ते 8 वी उच्च माध्यमिक अभ्यासक्रमावर आधारीत असेल. दिनांक 13 फेब्रुवारी 2013 च्या शासन निर्णयानुसार निश्चित केलेली शैक्षणिक व व्यावसायीक अर्हताप्राप्त केलेले उमेदवार सदर परीक्षेला प्रविष्ठ होण्यास पात्र राहतील.